တာချီလိတ်မြို့နယ် မိုင်းကိုးကျေးရွာအုပ်စု၌ တစ်ကြိမ်တစ်ခါမှ မကြုံဖူးသည့် ရေလွှမ်းမိုးမှုဖြစ်ပေါ်

ဩဂုတ်လ ၄ ရက် နံနက် ၃နာရီမှ စတင်ကာ မိုးအဆက်မပြတ်ရွာသွန်းပြီး ပန်ဟတ်ချောင်းမှ တောင်ကျရေများ စီးဆင်းလာမှုကြောင့်  တာချီလိတ်မြို့နယ် မိုင်းကိုးကျေးရွာအုပ်စုအတွင်းရှိ ဟွေရန်း(၁)၊ ဟွေရန်း(၂)၊ ဆီလီငေါ့၊ ၀မ်ကဲကျေးရွာများတွင် ရေ ၅ပေခန့်အထိ မြင့်တက်ခဲ့ကာ နေအိမ်များ ရေလွှမ်းမိုးခြင်းခံခဲ့ရပါသည်။


 မိုးအဆက်မပြတ်ရွာသွန်းခဲ့မှုကြောင့် နေအိမ်အချို့၏ အုတ်တံတိုင်းများ ပြိုကျခြင်းများရှိခဲ့သည်မှအပ နေအိမ် အဆောက်အအုံများ ပျက်စီးခြင်း၊ လူနှင့်တိရိစ္ဆာန်များ ထိခိုက်သေကျေခြင်းမရှိခဲ့သလို တောင်သုံးလုံးကျေးရွာအနီးရှိ တာချီလိတ်-ကျိုင်းတုံ ပြည်ထောင်စုလမ်းမကြီးဘေး တောင်နံရံတွင် ပေါက်ရောက်လျှက်ရှိသော သစ်ပင်ငယ်အချို့ ရေတိုက်စားခံရကာ လမ်းမကြီးပေါ်သို့ ကျရောက်ခဲ့သော်လည်း သက်ဆိုင်ရာတာဝန်ရှိသူတို့မှ အချိန်မီရှင်းလင်းပေးခဲ့သည့်အတွက် ယာဉ်သွားလာမှု ပြတ်တောက်ခြင်း မရှိခဲ့ပါ။


မိုးရွာသွန်းမှုကြောင့် နံနက် ၁၀နာရီအချိန်အထိ တိုင်းထွာချက်အရ မိုးရေချိန် ၂.၇၄ လက်မအထိရှိခဲ့ပြီး တာချီလိတ်-ကျိုင်းတုံ ပြည်ထောင်စုလမ်းမကြီး မိုင်တိုင်အမှတ် ၁၂၇ တွင် လမ်းမကြီးပေါ်သို့ ၁ပေခန့် ရေကျော်ခဲ့ပြီး မွန်းတည့် ၁၂း၃၀နာရီ အချိန်တွင် ရေပြန်ကျသွားခဲ့ကာ ဆက်သွယ်ရေး ပြတ်တောက်မှုမရှိခဲ့ပါ။

အဆိုပါ ရေကြီးနစ်မြုပ်ရာနေရာသို့ တာချီလိတ်စစ်ဗျူဟာအဖွဲ့(အခြေချ) စစ်ဗျူဟာမှူး ဗိုလ်မှူးကြီး သောင်းထိုက်ရွှေ ဦးဆောင်သော တပ်မတော်သားများ၊ ခရိုင်အုပ်ချုပ်ရေးမှူး ဦးသောင်းတင်ထွေး၊မြို့နယ်အုပ်ချုပ်ရေးမှူး ဦးရဲထူးနှင့် ဌာနဆိုင်ရာ တာဝန်ရှိသူများ၊ မြန်မာနိုင်ငံရဲတပ်ဖွဲ့ဝင်များ၊ နိုင်ငံရေးပါတီများ၊ လူမှုရေးအသင်းအဖွဲ့ဝင်များမှ ရေဘေးကယ်ဆယ်ရေး လုပ်ငန်းများအား ဆောင်ရွက်ပေးခဲ့ကာ သောက်သုံးရေနှင့် အစားအသောက်များအား ဝေငှပေးခဲ့ပါသည်။





ပုံများကိုကြည့်ရန်
တာချီလိတ်မြို့နယ် မိုင်းကိုးကျေးရွာအုပ်စု၌ ရေလွှမ်းမိုး